Республикалық референдум қарсаңында Жалған ақпаратқа қарсы іс-қимыл орталығы жаңа Конституция жобасының мәтініне де, референдум өткізілуіне де қатысты жалған және манипуляциялық ақпарат тарату фактілерінің азайғанын атап өтеді.
Мониторинг деректері бойынша, дәйексіз хабарламалардың таралуы жекелеген және нүктелік сипатқа ие әрі олар жедел анықталуда.
Мұндай фактілер бойынша материалдар қатысы бар тұлғаларды анықтау үшін құқық қорғау органдарына жолданады.
Бірқатар жағдайларда жалған ақпарат тарату үшін анонимді немесе жалған аккаунттар пайдаланылуда.
Кейде олар елге белгілі, беделді тұлғалардың есімдерімен ашылады.
Алайда, тәжірибе көрсеткендей, мұндай аккаунттардың жалған екені тез анықталып, содан кейін әлеуметтік платформалардың әкімшілігі тарапынан дереу жойылады.
Сондай-ақ, пікірлерді, «лайктарды» және репосттарды жасанды көбейту арқылы жекелеген жарияланымдарға халықтың назарын аударту әрекеттерінің де азайғаны байқалады.
Пайдаланушылар үшін мұндай манипуляциялық тәсілдер барған сайын айқын көрініп келеді, сондықтан олар кеңінен таралмайды.
Сонымен қатар, «тыныштық күні» кезеңінде және референдум өткізілетін күні ақпараттық шабуылдардың орын алу қаупі сақталады.
Мұндай сәттерде дәстүрлі түрде мәнмәтіннен жұлып алынған хабарламалар, қойылымдық бейнероликтер, дипфейктер, сондай-ақ болып жатқан оқиғалар туралы бұрмаланған түсінік қалыптастыратын басқа да материалдар пайда болуы мүмкін.
ҚР ІІМ ескертеді: көрінеу жалған ақпарат тарату заңнаманы бұзу болып табылады және ол үшін әкімшілік немесе қылмыстық жауапкершілік қарастырылған.
Құқық қорғау органдары референдум өткізу кезеңінде қоғамдық тәртіпті қамтамасыз етеді және ақпараттық кеңістікке мониторинг жүргізуді жалғастырады.
Жалған ақпаратқа қарсы іс-қимыл орталығы азаматтарды таратылатын ақпаратқа мұқият болуға, дәйексіз материалдарды таратудың еріксіз қатысушысына айналмауға және тек ресми хабарламалар мен тексерілген дереккөздерге сүйенуге шақырады.
Қаскөйлердің елді адастыруына, арандатушылық немесе манипуляциялық ақпарат арқылы теріс қоғамдық пікір қалыптастыруына жол бермеу маңызды.