2026 жылғы 1-10 наурыз аралығындағы ресми теріске шығарулар жиынтығы.
Фейк: Сирия мен Ауғанстаннан келген мигранттардың балаларды ұрлауы туралы ескерту.
ҚР ІІМ теріске шығаруы:Әлеуметтік желілер мен мессенджерлерде ҚР ІІМ атынан тараған, шетелдіктермен байланыс жасамауға шақырған «шұғыл хабарландыру» - жалған.
Бұл ақпарат мемлекеттік органдардың ресми хабарламаларына еш қатысы жоқ.
Бұған дейін де осындай хабарламалардың таралу дерегі тіркеліп, ресми теріске шығарылған болатын.
Фейк: Қазақстан Таяу Шығыс елдерінен босқындарды қабылдауға дайын.
ҚР СІМ теріске шығаруы:Аймақ мемлекеттерінен немесе халықаралық ұйымдардан босқындарды қабылдау туралы ресми өтініш түскен жоқ және тиісті шешім қабылданбады.
Қазақстанда халықаралық конвенция аясында босқындарды қабылдау рәсімдері бекітілген, алайда қазіргі тарап жатқан ақпарат шындыққа жанаспайды және аудиторияны жаңылыстыруға бағытталған.
Фейк: Мереке күндері Өскемен қаласының қоғамдық көлігінде жол жүру тегін болады.
Өскемен қаласы әкімдігінің баспасөз қызметінің теріске шығаруы: Whats
App желісі арқылы тараған 8, 15 және 22 наурыз күндері қоғамдық көлікте жол жүру тегін болады деген ақпарат – жалған.
ШҚО әкімдігі аталған күндері тегін жол жүру тәртібі енгізілмегенін мәлімдейді.
Фейк: Иран аумағындағы «қышқыл бұлттар» Орталық Азия елдеріне жетуі мүмкін.«Қазгидромет» РМК теріске шығаруы: «Қазгидромет» РМК мамандары қышқыл жауын-шашынның өнеркәсіптік ластану көздеріне жақын жерде пайда болатын күкірт пен азот тотықтарынан түзілетінін түсіндірді.
Ауа массалары алыс қашықтыққа тасымалданған кезде бұл заттардың концентрациясы айтарлықтай төмендейді.
Қазіргі уақытта мұндай ластанулардың Қазақстан мен Орталық Азия аумағына ауысу белгілері тіркелген жоқ.
Фейк: Астана қаласының көшелерінде әскери техниканың қозғалысы.
ҚР Қорғаныс министрлігінің теріске шығаруы:Әскери техниканың қозғалысы әуе шабуылына қарсы қорғаныс бөлімшелерінің жауынгерлік даярлығы аясында жоспарлы түрде жүзеге асырылуда.
Бұл іс-шаралар Қарулы Күштердің бекітілген жоспарына сәйкес өткізілетін тұрақты тәжірибе болып табылады.
Бұған дейін ведомство осыған ұқсас мәселе бойынша жұртшылықты хабардар еткен болатын.
ҚР ІІМ Киберқылмысқа қарсы іс-қимыл департаменті ескертеді:Шетелдегі жалған бос жұмыс орындарынан сақ болыңыздар.
Алаяқтар жоғары жалақы, тегін ұшу мен тұруды, тәжірибе мен тіл білудің қажет еместігін уәде етеді.
Алайда, барған соң құжаттарды тартып алу, бостандықты шектеу, алаяқтыққа мәжбүрлеу және психологиялық қысым көрсету қаупі жоғары.
ІІМ жұмысқа тек лицензиясы бар агенттіктер арқылы орналасуды ұсынады.
Қосымша: Жаңа Конституция жобасы бойынша Референдум қарсаңында Жалған ақпаратқа қарсы іс-қимыл орталығы азаматтарды әлеуметтік желілердегі бюллетеньдерді топтап салу туралы бейнероликтердің таралуына қатысты ескерту жасайды.
Талдау нәтижесі көрсеткендей, бұл материалдардың басым бөлігі бұрын басқа елдерде түсірілген немесе арнайы қойылымдық видеолар болып табылады.