Өткен аптадағы мемлекеттік органдардың ресми теріске шығаруларының жиынтығы
Жалған ақпарат: Қазақстанда банкоматтар арқылы қолма-қол ақша алатын азаматтардың мемлекеттік деректер базасы құрылып жатыр.
ҚР Ұлттық банкінің теріске шығаруы:Таратылып жатқан ақпарат манипулятивті сипатқа ие және шындыққа сәйкес келмейді.
Банкоматтардағы бейнебақылау камералары тек қауіпсіздікті қамтамасыз ету, алаяқтықтың алдын алу және оқиғаларды тергеу мақсатында қолданылады.
Оларды орнату талабы 2016 жылдан бастап қолданыста және ҚР Ұлттық банкінің нормативтік құқықтық актілерімен бекітілген.
Бейнежазбалар заңнамада белгіленген мерзімдерде сақталады және азаматтарды қосымша есепке алу немесе бақылау мақсатында пайдаланылмайды.
Жалған ақпарат: Қазақстанда аулалар мен саябақтарда құстарды, тиіндерді және иесіз жануарларды тамақтандырғаны үшін айыппұл қарастырылған.
ҚР ІІМ Әкімшілік полиция комитетінің теріске шығаруы:Қазақстан Республикасының заңнамасында иесіз жануарларды тамақтандырғаны үшін айыппұл көзделмеген.
Алайда қоғамдық орындарды ластау жағдайдарында жауапкершілік туындауы мүмкін.
Мұндай жағдайларда жануарларды тамақтандырғаны үшін емес, жалпыға ортақ пайдаланылатын орындарды ластағаны үшін ҚР ӘҚБт
К-нің 432-2-бабы қолданылады.
Жалған ақпарат: Esentai City элиталық кешеніндегі элиталық тұрғын үйлер күштік құрылымдарға беріліп, ішкі істер органдары тарыпынан пайдаланылып жатыр.
Қазақстан Республикасы Ішкі істер министрлігінің теріске шығаруы:Аталған ақпарат шындыққа сәйкес келмейді.
Көрсетілген жылжымайтын мүлік нысандары ҚР Ішкі істер министрлігіне берілмеген және ішкі істер органдарының балансында жоқ.
ІІМ-нің құрылымдық бөлімшелері бұл пәтерлерді өз қарамағына қабылдамаған, іс жүзінде пайдаланбайды және оларды қызметтік немесе өзге де мақсаттарда пайдалануды жоспарлап отырған жоқ.
Жалған ақпарат: «Қазатомөнеркәсіп» ҰАК» АҚ Laramide Resources Ltd. және Aral Resources Ltd. компанияларының Қазақстан аумағындағы уран барлау жобаларына қатысады.«Қазатомөнеркәсіп» ҰАК» АҚ-ның ресми мәлімдемесі: Қазатомөнеркәсіптің Laramide Resources Ltd. және Aral Resources Ltd. компанияларымен бірлескен кәсіпорындары, шарттық қатынастары немесе ортақ жобалары жоқ және бұрын да болмаған.
Жарияланымдарда аталған жобалар үшінші тараптардың бастамалары болып табылады және «Қазатомөнеркәсіп» компаниясының қызметіне қатысы жоқ.
Жалған ақпарат: Қазақстан Бейбітшілік кеңесіне 1 млрд АҚШ доллары көлемінде міндетті жарна төлеу шартымен кірді.
Ақорданың баспасөз қызметінің түсіндірмесі: «Кеңеске мүше болған сәттен бастап мемлекеттің онда болу мерзімі үш жылды құрайды.
Жарғыда көрсетілген 1 млрд АҚШ доллары көлеміндегі ерікті жарна мүшеліктің міндетті шарты болып табылмайды.
Бұл - әрбір қатысушы мемлекеттің құқығы.
Мұндай жарна алғашқы жыл ішінде енгізілген жағдайда, мемлекет Кеңестегі мүшелігін белгіленген үш жылдық мерзімнен тыс ұзарту мүмкіндігіне ие болады.
Қазақстан Бейбітшілік кеңесіне ешқандай қаржылық жарнасыз кірді, бұл Жарғының ережелеріне толық сәйкес келеді».
Жалған ақпарат: Қазақстанда «балаларда зиянды әдеттерді қалыптастырғаны үшін» ата-аналардың жауапкершілігі күшейтіліп, жаза автоматты түрде қолданылады деген ақпарат таралуда.
ҚР ІІМ Әкімшілік полиция комитетінің түсіндірмесі:Таратылып жатқан хабарламаларда заңнама нормалары бұрмаланып түсіндірілген және олар шындыққа сәйкес келмейді.
Қолданыстағы заңнамада Қазақстан Республикасы Әкімшілік құқық бұзушылық туралы кодексінің 127-бабына сәйкес ата-аналардың (немесе заңды өкілдердің) өз міндеттерін орындамауы үшін жауапкершілік көзделген.
Алайда бұл жауапкершілік автоматты түрде қолданылмайды.
Әкімшілік жауапкершілікке тарту тек бірқатар мән-жайлардың жиынтығы анықталған жағдайда ғана мүмкін.
Атап айтқанда: ата-аналардың алкогольдік ішімдіктерді жүйелі түрде теріс пайдалануы, баланың өмір сүруі мен дамуы үшін тиісті жағдайлардың жасалмауы, сондай-ақ ата-аналардың мінез-құлқының баланың психикалық және адамгершілік дамуына теріс әсер етуі.
Әрбір жағдай жеке тәртіппен қаралады, ал шешім барлық мән-жайларды ескере отырып, тек сот арқылы қабылданады.