Интернет кеңістігінде Mellstroy Game атты кезекті қауіпті челлендж кеңінен тарауда.
Оны қазіргі уақытта Ресей мен Беларусьта халықаралық іздеуде жүрген стример Андрей Бурим (Mellstroy деген атпен белгілі) іске қосқан.
Ол қатысушыларға жалпы құны 1,5 млн АҚШ долларын құрайтын пәтерлер мен бағалы сыйлықтар ұтысын уәде еткен.
Ойынға қатысу үшін пайдаланушылар #Mellstroy
Game хэштегін қойып, оның аты немесе казино атауы көрсетілген бейнеролик түсіру жеткілікті.
Басты мақсат - құмар ойындарды кез келген тәсілмен вирустық жарнамалау.
Хайп тудыру және бұған дейін Mellstroy орындамаған бағалы сыйлықтар мен ақшалай сыйақылар уәделері арқылы аудиторияны демонстративті әрі қауіп деңгейі жоғары әрекеттерге итермелеуде.
Әсіресе құмар ойындарға тәуелді осал топтарға, алдымен қаржылық қиын жағдайда қалғандар және ойынға тәуелділіктен зардап шеккендерге - «жылдам ұтыс» уәделері ерекше әсер етеді; осындай уәделер олардың денсаулығына, абыройына немесе еркіндігіне қауіп төндірсе де, қатысуға итермелейді.
Мұндай тәсілдер еліктеуді күшейтіп, қауіпті әрекеттердің қоғамдық ортада қайталануын арттырады.
Төменде осының нақты мысалдары көрсетілген:– Марий Эл өңірінде анасы нәрестесінің денесіне казино атауын «татуировка ретінде салған»;
– Қазақстанда ер адам өз тегін ресми түрде «Мелстрой» деп өзгерткен;
– Астана қаласында қатысушылардың бірі MEGA SILKWAY сауда орталығында тек іш киіммен жүгірген.
Мұндай әрекеттер адам абыройын қорлап қана қоймайды, сонымен бірге құқықтық жауапкершілікке алып келуі ықтимал.
Құмар ойындарды жарнамалауға қатысты челлендждерге қатысу Қазақстан Республикасының және кейбір ТМД елдерінің заңнамасын бұзу болып табылады.
Қоғамдық орындарда жасалатын арандатушылық әрекеттер ұсақ бұзақылық ретінде сараланып, әкімшілік немесе қылмыстық жауапкершілікке әкеп соғуы мүмкін.
Осы мазмұндағы контентті тарату, әсіресе кәмелетке толмағандарды тарту жағдайында, заңсыз қызметті насихаттау немесе оған жәрдемдесу ретінде қарастырылуы ықтимал.
Жалған ақпаратқа қарсы іс-қимыл орталығы бұл мәселе туралы «Инфосығандар» атты шығарылымында хабарлаған болатын.
Инфоциалшылар және жосықсыз блогерлер азаматтардың сенімін пайдаланып, «оңай табыс» пен «байлық құпиялар» жөнінде жалған уәде береді.
Олардың мақсаты — аудиторияны қауіпті схемалар мен құмар ойын жобаларына тарту арқылы қаржылық пайда табу.
Өз қауіпсіздігіңізді қорғау ережелері:– жеңіл ақша мен ірі жүлделерге қатысты уәделерге алданбаңыз;
– казино, бәс тігу немесе тәуекелді әрекеттермен байланысты челлендждерге қатыспаңыз;
– мұндай видеоларды тіпті «әзіл ретінде» болса да таратпаңыз;
– ақпарат көздерін және акциялардың шарттары мен құқықтық талаптарын тексеріңіз.
Есте сақтаңыз: хайп - абырой мен ақыл-ойды жоғалтуға себеп болмауы тиіс.
Әрбір азамат өз әрекеттері үшін жауапты және өзін жалған ақпараттан ғана емес, сондай-ақ құқықтық салдарға әкелуі мүмкін манипуляциялардан да қорғауға міндетті.