"Kursiv Media" басылымының қателігі әлдеқайда ауыр салдарға әкелуі мүмкін еді«Алматы қаласында қазақ мектебінің үлесі 16% ғана» (қазіргі таңда өшірілген) материалында Kursiv.
Media мегаполис мектептері туралы шындыққа сәйкес келмейтін деректерді таратты.
Материал авторы Алматыда небәрі 68 қазақ мектебі бар, бұл жалпы санның 16%-ын құрайды деп көрсетті.
Бұл деректер ресми ретінде ұсынылғанымен, шындыққа сәйкес келмейді.
Қай жерде қате кеткен?
Журналист Талғат Дүйсенбек статистиканы түсіндіру барысында өрескел қателік жіберді.
Ол қазақ тілінде оқытатын мектептердің санын төмендетіп көрсетіп, ал жалпы білім беретін мектептердің санын асырып жіберген.
Сонымен қатар, эмоциялық риториканы пайдаланып, жағдайды «қазақ мектептерінің жетіспеушілігі» ретінде көрсетті.
Мұндай интерпретация оқырмандарда қаланың білім беру саясатына қатысты жалған түсінік қалыптастыруы мүмкін еді.
Осындай жарияланымдар қоғамда наразылық тудырып, шынайы деректерге емес, бұрмаланған ақпаратқа негізделген пікірталастарға себеп болуы ықтимал.
Шын мәнінде жағдай қалай?
Алматы қаласы бойынша Ұлттық статистика бюросының және Алматы қаласының Өңірлік коммуникациялар қызметінің ресми деректеріне сәйкес: Алматыда 358 мектеп жұмыс істейді. Оның ішінде 109 мектеп толықтай қазақ тілінде білім береді – бұл 30,5%, 16% емес. Бүгінде мегаполис оқушыларының 51%-дан астамы мемлекеттік тілде білім алуда. Соңғы 12 жылда Алматыда 24 жаңа мектеп ашылды, оның 19-ы – қазақ тілінде оқытатын мектептер.
Бұдан бөлек, тағы жиырмаға жуық мектептің құрылысы жүріп жатыр.
Бұл деректер ата-аналардың балаларын мемлекеттік тілде оқытуға ұмтылысын да, сондай-ақ қазақ тілін ана тілі ретінде таңдағандардың барлығына қолжетімді тілдік орта құруға бағытталған жүйелі мемлекеттік саясатты да айқын көрсетеді.
БАҚ-тағы мұндай «қателіктер» қоғам үшін де, яғни білім беру жүйесіне сенімге сызат түсіріп, әлеуметтік шиеленісті күшейту қаупін төндірсе, редакциялар үшін де қауіпті.
Себебі асығыс әрі тексерілмеген әрекеттер Қазақстан Республикасының ақпарат тарату саласындағы заңнамасын ескере отырып, құқықтық салдарға әкелуі мүмкін.
Жалған ақпаратқа қарсы іс-қимыл орталығы медиа өкілдерін статистиканы мұқият тексеруге және әлеуметтік маңызы жоғары тақырыптарды жариялау барысында редакциялық саясатқа бола деректерді бұрмалаудан аулақ болуға шақырады.
Чат-бот - @Anti Fake
Center Bot